ندیم بھابھہ غزلیں

اس کی آنکھوں کے دریچوں میں رہا کرتے تھے
سچے خوابوں کی طرح ہم بھی ہوا کرتے تھے
اب یہ تجھ پر ہے محبت میں ہمیں جیسے گزار
ورنہ ہم لوگ تو مرضی سے جیا کرتے تھے
اے محبت کو بڑا کام سمجھنے والو
یہ بڑا کام کبھی ہم بھی کیا کرتے تھے
ندیم بھابھہ
____________________________
عرشی ، فرشی مست ہیں ، آئے جناب حُسین
آدم تو تعبیر تھے ، اصل میں خواب حُسین

آدھی خلقت کھوج میں ، آدھی سوگ بھری
عشق سوال حُسین تھے ، عشق جواب حُسین

پوچھو جو ہے پوچھنا ، عاشق بول رہے
سارے علوم ہیں عشق کے ، اور کتاب حُسین

اک براق سوار ہے ، اک مسجود نشین
سائیں خوش خوش بول اٹھے ، واہ جناب حُسین

حق پر سر کٹوائیے ، حق ہی ہے معراج
رونے والو ! غور ہو ، کریں خطاب حُسین

جوڑی ہے حسنین کی ، یعنی جمال ، جلال
ایک عمل مقبول ہے ، ایک ثواب حُسینندیم بھابھہ
____________________________

دل سے اک یاد بھلا دی گئی ہے

کسی غفلت کی سزا دی گئی ہے

میں نے منزل کی دعا مانگی تھی

میری رفتار بڑھا دی گئی ہے

عیب دیوار کے ہوں گے ظاہر

میری تصویر ہٹا دی گئی ہے

میں نے اک دل پہ حکومت کیا کی

مجھے تلوار تھما دی گئی ہے

اب محبت کا سبب ہے وحشت

ورنہ حسرت تو مٹا دی گئی ہے

اب یہاں سے نہیں جا سکتا کوئی

اب یہاں شمع جلا دی گئی ہے

اس لئے جم کے یہاں بیٹھا ہوں

مجھ کو میری ہی جگہ دی گئی ہے

محمد ندیم بھابھہ

---------------------------------------------------------------------------------

سہولت ہو اذیت ہو تمہارے ساتھ رہنا ہے

کہ اب کوئی بھی صورت ہو تمہارے ساتھ رہنا ہے

ہمارے رابطے ہی اس قدر ہیں، تم ہو اور بس تم

تمہیں سب سے محبت ہو تمہارے ساتھ رہنا ہے

اور اب گھر بار جب ہم چھوڑ کر آ ہی چکے ہیں تو

تمہیں جتنی بھی نفرت ہو تمہارے ساتھ رہنا ہے

ہمارے پاؤں میں کیلیں اور آنکھوں سے لہو ٹپکے

ہماری جو بھی حالت ہو تمہارے ساتھ رہنا ہے

تمہیں ہر صبح اور ہر شام ہے بس دیکھتے رہنا

تم اتنے خوب صورت ہو تمہارے ساتھ رہنا ہے

محمد ندیم بھابھہ

---------------------------------------------------------------------------------

کسی سبب سے ہی بے سبب تک پہنچ رہی ہے

مدد پہ زندہ ہوں اور جب تک پہنچ رہی ہے

ہم اپنی گردن جھکا کے کاغذ پہ لکھتے لکھتے

سمجھ رہے ہیں کہ بات رب تک پہنچ رہی ہے

ہوا کے ہاتھوں پیام دینے سے یہ ہوا ہے

تمام لوگوں کی رائے سب تک پہنچ رہی ہے

تم اپنی آنکھیں نہ ہار دینا اے صبر والو

کہ اک سفیدی سیاہ شب تک پہنچ رہی ہے

نئی طرح کی مزاحمتوں کا جنم ہوا ہے

غزال کی کوک بھی غضب تک پہنچ رہی ہے

-----------------------------------------------------